ഈഗിൾ ഹാസ് ലാന്റഡ് – 99

ശനിയാഴ്ച്ചയിലെ പ്രഭാതം. രാവിലെ പത്ത് മണി കഴിഞ്ഞിരിക്കുന്നു. ഹോബ്സ് എന്റ് ലക്ഷ്യമാക്കി തന്റെ കുതിരപ്പുറത്ത് പതുക്കെ നീങ്ങുകയാണ് മോളി. രാത്രി തോരാതെ പെയ്തിരുന്ന മഴ ശക്തി കുറഞ്ഞ് ചാറ്റൽ മഴയായി മാറിയെങ്കിലും വഴിയരികിലെ പാടശേഖരങ്ങളും ചതുപ്പുനിലങ്ങളും ഇപ്പോഴും മൂടൽ മഞ്ഞിന്റെ പിടിയിൽ അമർന്നിരിക്കുകയാണ്.

പതിവിലും നേരത്തെ ഉറക്കമുണർന്നതാണവൾ. ലെയ്കർ ആംസ്ബിയ്ക്ക് ഇന്ന് സെമിത്തേരിയിൽ ഒരു കുഴിയെടുക്കുവാനുള്ളതിനാൽ പശുക്കളെ കറക്കാൻ വരില്ല എന്ന് തലേദിവസം അറിയിച്ചിരുന്നു. പശുക്കൾക്കെല്ലാം ഭക്ഷണവും വെള്ളവും കൊടുത്തിട്ട് കറവയും അവൾ തന്നെ നിർവ്വഹിച്ചു. അതിന് ശേഷം തന്റെ കുതിരയുമായി ഹോബ്സ് എന്റിലെ ചതുപ്പുകൾകരികിലേക്ക് തിരിച്ചത് പെട്ടെന്നുണ്ടായ ഒരു ഉൾപ്രേരണയാലായിരുന്നു. ഡെവ്‌ലിൻ വിളിക്കുന്നത് വരെ അദ്ദേഹത്തെ അന്വേഷിച്ച് അങ്ങോട്ട് ചെല്ലുകയില്ല എന്ന് വാക്ക് കൊടുത്തിരുന്നെങ്കിലും അദ്ദേഹത്തിന് എന്തെങ്കിലും സംഭവിച്ചിരിക്കുമോ എന്ന ഉത്കണ്ഠ അവളുടെ മനസ്സിനെ അലട്ടിയിരുന്നു. ബ്ലാക്ക് മാർക്കറ്റ് ബിസിനസുമായി ബന്ധമുള്ളവർക്ക് പിടിക്കപ്പെട്ടാൽ കടുത്ത ജയിൽ ശിക്ഷയാണ് അനുഭവിക്കേണ്ടി വരിക.

കോട്ടേജിന്റെ പിൻ‌ഭാഗത്ത് കൂടി കോമ്പൌണ്ടിലേക്ക് കടന്നാലോ എന്ന ചിന്തയിൽ അവൾ കുതിരയെ ചതുപ്പിനുള്ളിലേക്ക് നയിച്ചു. ചതുപ്പിലേക്ക് ഇറങ്ങിയ കുതിരയുടെ അടിവയറ് വരെ എത്തിയ ചളിവെള്ളം അവളുടെ ഷൂവിനുള്ളിലും അൽപ്പം കയറാതിരുന്നില്ല. എന്നാൽ അത് അത്ര കാര്യമാക്കാതെ കുതിരയെ അതിന്റെ ഇഷ്ടത്തിന് വിട്ട് അതിന്റെ കഴുത്തിലേക്ക് ചാഞ്ഞ് കിടന്ന് മൂടൽ മഞ്ഞിനുള്ളിലൂടെ എന്തെങ്കിലും ദൃശ്യമാകുന്നുവോ എന്ന് സൂക്ഷിച്ച് നോക്കി. വിറക് എരിയുന്ന പുകയുടെ ഗന്ധത്തിനായി അവളുടെ നാസിക വെമ്പൽ കൊണ്ടു. മഞ്ഞിന്റെ ആവരണത്തിലൂടെ പതുക്കെ ആ ധാന്യപ്പുരയും ഡെവ്‌ലിന്റെ കോട്ടേജും തെളിഞ്ഞ് വന്നു. അതേ… കോട്ടേജിന്റെ ചിമ്മിനിയിൽ നിന്നും പുക മുകളിലേക്കുയരുന്നുണ്ട്.

എന്ത് ചെയ്യണമെന്നറിയാതെ ഒരു നിമിഷം അവൾ ശങ്കിച്ചു. ലിയാം അവിടെത്തന്നെയുണ്ട്… ഉദ്ദേശിച്ചതിലും നേരത്തെ അദ്ദേഹം തിരിച്ചെത്തിക്കാണണം.  പക്ഷേ, ഇപ്പോൾ അങ്ങോട്ട് കയറിച്ചെന്നാൽ അദ്ദേഹത്തിന്റെ ജോലിക്കാര്യങ്ങളിൽ വീണ്ടും താൻ അനാവശ്യമായി ഇടപെടുന്നു എന്നായിരിക്കും ധരിക്കുക. അവൾ കുതിരയെ പതുക്കെ  പിറകോട്ട് തിരിച്ചു.

                             ** ** ** ** ** ** ** ** ** ** ** ** ** ** ** ** 

പുറത്തേക്ക് ഇറങ്ങുന്നതിനുള്ള തയ്യാറെടുപ്പിനോടനുബന്ധിച്ച് പാരട്രൂപ്പ് സംഘാംഗങ്ങൾ ധാന്യപ്പുരയിൽ തങ്ങളുടെ ആയുധങ്ങൾ പരിശോധിച്ചുകൊണ്ടിരിക്കുകയാണ്. ജീപ്പിൽ ബ്രൌണിങ്ങ് M2 മെഷീൻ ഗണ്ണുകൾ മൌണ്ട് ചെയ്യുന്നതിന്റെ മേൽനോട്ടം വഹിക്കുകയാണ് ബ്രാൺ‌ഡ്ടും സർജന്റ് ആൾട്മാനും. ഇതിന്റെയെല്ലാം സൂത്രധാരൻ താനാണ് എന്ന മട്ടിൽ കൈകൾ പിന്നിൽ കെട്ടി വീക്ഷിച്ചുകൊണ്ട് നിൽക്കുന്ന പ്രെസ്റ്റണെ ഒന്ന് കാണേണ്ടത് തന്നെയായിരുന്നു.

ധാന്യപ്പുരയുടെ പിൻ‌ഭാഗത്തെ പാതി തുറന്ന ജനാലയിൽ ബൈനോക്കുലേഴ്സിലൂടെ ദൂരെയുള്ള ചതുപ്പ് നിലങ്ങൾ നിരീക്ഷിച്ചുകൊണ്ടിരിക്കുകയാണ് വെർണർ ബ്രീഗലും ക്ലൂഗലും. കാട്ടുതാറാവുകളും കുളക്കോഴികളും മറ്റുമായി ധാരാളം പക്ഷി വർഗ്ഗങ്ങളെ ആ ഈറ്റക്കാടുകളിൽ അവർക്ക് കാണാനായി.

“അതാ, അവിടെ മറ്റൊന്ന്… ഒരു പച്ച സാന്റ് പൈപ്പർ… വസന്തകാലത്ത് ദേശാടനത്തിനായി പുറപ്പെടുന്ന പക്ഷിയാണ്… പക്ഷേ, അവ ബ്രിട്ടണിൽ എത്തുമ്പോഴേക്കും ശൈത്യകാലമാകും…” ബൈനോക്കുലേഴ്സ് അല്പം വലത് വശത്തേക്ക് പതുക്കെ മാറ്റിക്കൊണ്ട് ക്ലൂഗൽ പറഞ്ഞു. പെട്ടെന്നാണ്‌ അയാളുടെ ദൃഷ്ടിപഥത്തിൽ മോളി കടന്ന് കയറിയത്.

“മൈ ഗോഡ്…! ആരോ നമ്മളെ നിരീക്ഷിക്കുന്നുണ്ട്…!” ക്ലൂഗൽ അമ്പരപ്പോടെ പറഞ്ഞു.

ഞൊടിയിടയിൽ ബ്രാൺ‌ഡ്ടും പ്രെസ്റ്റണും അയാളുടെ അരികിൽ ഓടിയെത്തി.

“ഐ വിൽ ഗെറ്റ് ഹെർ…” മോളിയെ കണ്ടതും പ്രെസ്റ്റൺ തിരിഞ്ഞ് വാതിലിനടുത്തേക്ക് പാഞ്ഞു.

അയാളെ പിടിച്ച് നിർത്താൻ ബ്രാൺ‌ഡ്ട് തുനിഞ്ഞെങ്കിലും വൈകിപ്പോയിരുന്നു. മുറ്റവും കടന്ന് നിമിഷങ്ങൾക്കകം അയാൾ ഈറ്റക്കാടുകൾക്കുള്ളിലെത്തി. മോളി തന്റെ കുതിരയുടെ കടിഞ്ഞാൺ നിയന്ത്രിച്ച് അയാളുടെ നേർക്ക് തിരിച്ചു. തന്റെ അരികിലേക്ക് ഓടി വന്നത് ഡെവ്‌ലിൻ ആണെന്നായിരുന്നു ആദ്യം അവൾ കരുതിയത്. കുതിരയുടെ കടിഞ്ഞാണിൽ പിടുത്തമിട്ട പ്രെസ്റ്റണെ അമ്പരപ്പോടെ അവൾ നോക്കി.

“നിന്നെ ഞങ്ങൾക്ക് വേണം…” പ്രെസ്റ്റൺ അവളെ പിടിക്കുവാൻ തുനിഞ്ഞു.

അയാളുടെ പിടിയിൽ നിന്നും രക്ഷപെടുവാനുള്ള വ്യഗ്രതയിൽ അവൾ കുതിരയെ മുന്നോട്ട് തെളിക്കുവാൻ ശ്രമിച്ചു. “എന്നെ വെറുതെ വിട്ടേക്കൂ… ഞാൻ നിങ്ങൾക്കൊരു ദ്രോഹവും ചെയ്തില്ലല്ലോ…”

പ്രെസ്റ്റൺ അവളുടെ വലത് കൈത്തണ്ടയിൽ പിടിച്ച് താഴേക്ക് വലിച്ചു. കുതിരപ്പുറത്ത് നിന്നും താഴേക്ക് വീഴാനാഞ്ഞ അവളെ പ്രെസ്റ്റൺ തന്റെ കൈകളിൽ ഏറ്റുവാങ്ങി. 

“നിന്നെ വെറുതേ വിടണോ വേണ്ടയോ എന്ന് വഴിയേ തീരുമാനിക്കാം… എന്താ അങ്ങനെയല്ലേ…?”

തന്റെ കൈകളിൽ നിന്നും കുതറിമാറാൻ ശ്രമിക്കുന്ന അവളുടെ മേൽ അയാൾ പിടി മുറുക്കി. എന്നിട്ട് അവളെ തന്റെ ചുമലിൽ എടുത്തിട്ട് പ്രെസ്റ്റൺ ഈറ്റക്കാടിനുള്ളിലൂടെ ധാന്യപ്പുരയുടെ നേർക്ക് നടന്നു.

(തുടരും)

അടുത്ത ലക്കത്തിന് ഇവിടെ ക്ലിക്ക് ചെയ്യുക...